Ofelia López Bermúdez (Aguias–Muras, 1952) Poeta e pintora, reside nas Pontes desde 1976.
O seu arraigo ao rural lévaa a escribir poemas sobre as imaxes que lle van quedando ao longo de todos estes anos da súa vida. No ano 2002 fórmase o Grupo Poético Alalá, e Ofelia é unha das súas fundadoras. É desde ese momento que a escrita se converte nunha actividade constante na súa vida. Co grupo publica un libro colectivo de poesía baixo o título Cinco Sentidos e tamén escribe poemas para revistas locais. Ademais, participa en numerosos recitais e diferentes actividades relacionadas co mundo da literatura que organiza o devandito grupo e tamén colabora con outras institucións culturais. O grupo celebrou no ano 2013 o seu décimo aniversario e publicou un libro colectivo titulado Dez anos de poesía nas Pontes, onde aparecen diferentes poetas que estiveron convidados nos recitais ademais dos propios integrantes de Alalá. Neste mesmo ano publica en solitario Fume de cerna. 
No ano 2012 é unha das impulsoras e fundadoras do grupo de artistas ponteses ARTPO.

Peta o inverno nos cristais
altivo, fachendoso, tirano.

Os corvos planan contra o nordés
nun día curto e xélido de xaneiro,

semellan gaivotas en danza maina
sobre a corrente do río acedo.

Todo cala cando o vento bate,
o río non, o río roxe, roxe, roxe...

Mirando ó sur e agardando acougo
as árbores núas e indefensas resisten,

as nubes aterecidas, espalladas,
dubidan, trabucan o seu rumbo.

Aínda coa certeza de ser temporal
tremo mirando os remuíños do lixo.

Neste intre, atónita, trala ventá,
avalío a sorte de ter un teito.

Do poemario da autora Fume de cerna.