Letra de Manuel María. Título orixinal do poema "O arado" do libro Os soños na gaiola (1972) 
Mini (Xosé Luís Rivas Cruz), nado en Begonte o 18 de xuño de 1951, e Mero (Baldomero Iglesias Dobarrio), Vilalba, 27 de xuño de 1951. Músicos, poetas, mestres e investigadores do folklore e a cultura tradicional de Galicia, membros históricos de Fuxan os Ventos e actuais compoñentes de A Quenlla. Ademais da súa produción discográfica con estes grupos, teñen participado por separado ou conxuntamente noutros discos de música galega como o Quiquiriqui (2006) producido pola Asociación de Gaiteiros Galegos e en obras teatrais como Pan, catro propostas arredor da malla e publicado diversos libros. É salientable o seu labor de recompilación de contos, lendas, refráns, ditos ou poemas, principalmente na súa Terra Chá natal e nas zonas onde exercen o seu traballo de mestres: Mesía (Mero) e Boimorto (Mini). O arquivo sonoro froito deste labor, composto por milleiros de cintas magnetofónicas, foi cedido ao Museo do Pobo Galego para a súa dixitalización e incorporación ao Arquivo do Patrimonio Oral da Identidade (APOI). No campo educativo son autores de diveros libros de texto de ciencias sociais, naturais e lingua galega para o ensino infantil e primario. En abril de 2009 foilles concedido o Pedrón de Ouro, e en outubro de 2011 o Premio Ramón Piñeiro “Facer país” como recoñecemento á súa traxectoria de corenta anos de investigación musical.

Labrado da miña mau

fixen coa miña navalla

un aradiño de pau,

un aradiño de pau,

un aradiño de pau...

Leva timón e chavella

i unha rella furadora

feita dunha lata vella,

feita dunha lata vella,

feita dunha lata vella!

Ten orelleiras, rabela

tan luída e rematada

que namora mirar pra ela,

que namora mirar pra ela,

que namora mirar pra ela!

O meu arado é tan feito

que pode incluso esfender

labradíos a barbeito, 

labradíos a barbeito, 

labradíos a barbeito...!

Teño xa que darlle estreno

ao meu arado arador,

ao meu arado pequeno,

ao meu arado pequeno,

ao meu arado pequeno...!

E non sei onde hei de ir

buscar os bois que preciso,

buscar os bois pra xunguir, 

buscar os bois pra xunguir,

buscar os bois pra xunguir!

Labrado da miña mau

fixen coa miña navalla

un aradiño de pau, 

un aradiño de pau,

un aradiño de pau,

un aradiño de pau,

un aradiño de pau...