Plácido Vigueret Villar, de Neaño, Cesullas, Cabana de Bergantiños.
Carpinteiro, emigrante e músico tradicional, último compoñente vivo do grupo histórico 'Gaiteiros Enxebres de Neaño'. Toca á perfección a pandeireta, caixa ou tamboril, bombo e cunchas. É coñecedor do repertorio tradicional cantado polo grupo de gaitas do que formaba parte. Foi poeta popular desde a súa xuventude. Hai uns anos publicou Poemas (Concello de Cabana de Bergantiños). Protagonizou un dos programa de Alalá da TVG.

Texto de Xosé Manuel Varela Varela (Asociación Cultural Monte Branco)

Ghaiteiriños de Neaño

que naceches no Outeiro

antes de come-lo caldo

tocade a jota primeiro

alalala alalala

alalala alalala

tocade a jota primeiro

tamén a muiñeiriña

tamén ides comer bolo

feito na nosa lareiriña

Ghaiteiriños de Neaño

tocádea en Rebordelo

bebede aughuiña da fonte

e comede caldo con ghrelos

Toca ghaiteiriño toca

na túa ghaita ghaitiña

toca ghaiteiriño toca

tamén eu toco na miña

Os ghaiteiros de Neaño

van tocar a San Clemente

ghústalle moito tocar

onde os vexa moita xente

Os gaiteiros de Neaño

xa van pola Remoíña

veñen tocando na jota

a máis a muiñeiriña

Veñen as nenas bailando

bailan todas lixeiriñas

delas quen millor o fai

e Maruxa e mais Carmiña