IreneMontero
Nacín en Ferrol en 1970, nunha casa de lectores ávidos na que os libros sempre ocuparon un lugar destacado. Afeccionada ao teatro desde nena, tiven a oportunidade de participar en numerosas obras, a meirande parte delas en galego, salvo as últimas en inglés, na Facultade de Filoloxía de Santiago.
Filóloga de carreira, un máster de xornalismo fixo virar o rumbo da miña vida profesional. Actualmente, levo máis de 25 anos dedicada á comunicación corporativa, despois de pasar por varios medios informativos nos comezos da miña vida laboral. Isto permitiume facer da escrita o meu oficio, orientado habitualmente a textos informativos e divulgativos.
Aínda que xa escribira pequenos relatos e poemas que nunca cheguei a compilar nin publicar, o tempo de confinamento en 2020 permitiume rematar a miña primeira obra literaria, unha novela curta titulada Lúa Nova, baseada nunha moza do meu pobo, Oleiros, coa que consigo gañar a oitava edición do Premio de Novela Curta Cidade Centenaria de Ribeira e que sae á luz, da man de Edicións Xerais, en maio de 2022.
[Marzo de 2023]
