Seica Michelangelo dicía que o seu traballo como artista era atopar a escultura oculta que xa había dentro dun bloque de mármore: limitábase a retirar o que sobraba. Ese materia prima súa era o resultado dun proceso metamórfico de varios millóns de anos que transforma o que noutrora eran cunchas mariñas en rocha caliza, que os procesos internos da terra acaban por converter en mármore. De igual xeito, tamén as historias nacen dun longo desenvolvemento no que se van sedimentando materiais diversos: o visto e o lido, o recordado e o esquecido, os mortos e os vivos. Igual que a actividade tectónica empurra do mármore ata sacalo á superficie, tamén eses compoñentes do relato acaban por agromar. E, sen ousar compararnos co mestre italiano, temos que ir buscando os personaxes e as historias para que vexan a luz. Facémolo coas ferramentas do oficio, pero tamén coa guía da intuición, que non é máis que aquilo que non sabiamos que sabiamos.

Atopar (e escribir) as historias (agochadas)

A cargo de Xesús Fraga, cunha sesión especial con Ángel de la Cruz.

Hai 15 prazas para persoas maiores de 18 anos. A inscrición, gratuíta, realizarase, indicando nome e apelidos, xunto ao nome do obradoiro, enviado un correo electrónico a oficina@aelg.org. As solicitudes atenderanse por orde cronolóxica de chegada. A inscrición de cada persoa participante entenderase feita para o conxunto da actividade.

Horarios e calendario:
De 17:00 a 20:00 h. os sábados:
- 24 e 31 de outubro
- 7, 14, 21 e 28 de novembro

De 17:00 a 19:00 h. o sábado:
- 12 de decembro

Todas as sesións terán lugar na Libraría Biblos (Rúa Santiago, 4), en Betanzos.