Chegou unha nova edición das Xornadas de Literatura Infantil e Mediación Literaria, baixo o título de Morreu o demo e viñeron os monicreques!
A actividade tivo lugar na cuarta feira/mércores 28 de outubro, ás 17:00 horas, no Salón de Actos da Facultade de Ciencias da Educación da Universidade da Coruña. Desde a Universidade colaboraron con esta actividade as profesoras Montserrat Muriano Rodríguez, Iria Sobrino Freire, Patricia Carballal Miñán e Andrea Maceiras Lafuente.
Participaron na actividade:
- Anxo García, quen falou sobre o Proxecto Barriga Verde: da barraca á aula.
- Larraitz Urruzola, quen fixo un Obradoiro de monicreques.
A entrada foi libre e gratuíta.

Os monicrequeiros Anxo García e Larraitz Urruzola comezaron relatando a investigación que realizaron desde a asociación Morreu o Demo para rescataren a memoria de Barriga Verde, figura creada pola familia Silvent no século pasado, emparentada coa tradición europea de Pulcinella, Punch e Guignol, entre outros. A seguir explicaron a tipoloxía de monicreques segundo a posición da persoa manipuladora (desde abaixo, desde arriba, á mesma altura ou no interior), a partir dunha mostra de marionetas de diferentes lugares do mundo. A actividade finalizou cun obradoiro de manipulación de monicreques de luva, coa participación do alumnado.
Á actividade asistiron arredor de 200 persoas, entre alumnado do Grao en Educación Infantil, persoal docente da Facultade e profesorado de centros de Educación Infantil.
