Aníbal Ánxel (Aníbal A. Rodríguez Requeijo)
Nace en Aldixe, Abadín (Lugo) no ano 1953. Con dez meses "renace" nas Pontes de García Rodríguez onde traballa de oficinista desde o ano 1977.
Cursa estudos no Colexio Pardo Bazán das Pontes e nas Universidades Laborales da Coruña, Tarragona e Eibar. En Santiago comeza Filoloxía Hispánica que pronto abandona.
Considérase autodidacta. Soña con ser un poeta popular e resistente. No ano 1973 gaña a Flor Natural dos primeiros "Xogos Florais" de Universidades Laborais, celebrado en Sevilla ao presentarse cunha obra en galego e outra en castelán. A súa obra é inédita, agás a publicada nos dous libros conxuntos co Grupo Poético Alalá (do que forma parte): Cinco Sentidos e Dez anos de poesía nas Pontes.

Teño un gran respeto pola cultura popular inda que é denostada. A miña poesía está entre poesía popular e poesía culta, porque tampouco non se pode (...) igual que na música, non? (É) decir, si tu podes alcanzar certa afinación e certa escelencia pois, débelo de facer. Tiña un compañeiro de traballo que me decía: "Pero é que vosoutros falades dunha maneira mui rara porque meus pais non falaban así." Eu (...) trataba de explicarlle que cando falamos, utilizamos un tipo de espresiós e palabras, e cando se escribe e cando queres contar unha historia tes que utilizar outras, outro lésico.