Decídeme, planificadores da morte
do antigo engado das cidades,
se vos semella que aínda
non destragástedes dabondo
a media lúa máxica
da fermosísima badía de A Coruña
feita de azul, luz e cristal
e que non tiña posíbel
comparación no mundo enteiro.
Aconséllovos que rematedes de vez
con toda a ría. Así poderedes
ir, nos vosos autos importados,
dende o Castelo de San Antón
deica Gandarío e Santa Cruz
lugares apropiados pra erguer
nucleares, fábricas de cemento,
refinerías, vertedeiros de lixo
e celulosas:
a única paisaxe
que vós merecedes e queredes.
Autor/a da transcrición: e~xenio