Acompañan todos os intervenientes e asistentes á polafía.

Xosé Luís Rivas Cruz (Mini), nado en Begonte o 18 de xuño de 1951, e Baldomero Iglesias Dobarrio (Mero), Vilalba, 27 de xuño de 1951, músicos, poetas, mestres e investigadores do folclore e a cultura tradicional de Galiza, membros históricos de Fuxan os Ventos e actuais compoñentes de A Quenlla. Ademais da súa produción discográfica con estes grupos, teñen participado por separado ou conxuntamente noutros discos de música galega como o Quiquiriqui  (2006) producido pola Asociación de Gaiteiros Galegos e en obras teatrais como Pan, catro propostas arredor da malla e publicado diversos libros. É salientábel o seu labor de recompilación de contos, lendas, refráns, ditos ou poemas, principalmente na súa Terra Chá natal e nas zonas onde exercen o seu traballo de mestres: Mesía (Mero) e Boimorto (Mini). O arquivo sonoro froito deste labor, composto por milleiros de cintas magnetofónicas, foi cedido ao Museo do Pobo Galego para a súa dixitalización e incorporación ao Arquivo do Patrimonio Oral da Identidade (APOI). No campo educativo son autores de diveros libros de texto de ciencias sociais, naturais e lingua galega para o ensino infantil e primario. En abril de 2009 foilles concedido o Pedrón de Ouro como recoñecemento á súa traxectoria de corenta anos de investigación musical.

I heime d'ir casar pra Castro

terriña de moita leña

hei de traguer un feixiño

pra cando a rumboia veña

Anda Xuana! árdeche a troia!

vénte comigo e bailaremo-la rumboia

Viva a rumboia! Rumboia viva!

Viva a rumboia anque sea noite e día!

Miña comadre Polonia

non vin muller coma ela

os ósos dállos ao home

a carne cómea ela

O lindo lindo, o miña xoia

imos a Lugo e bailaremo-la rumboia

Viva a rumboia! rumboia viva!

Viva a rumboia, rumboia da miña vida!
 

Tódolos carabineiros

dormen cos pés á xiada

e d'alí ao outro día

a festa da rumbeirada

Anda Xuana! árdeche a troia!

vénte comigo e bailaremo-la rumboia

Viva a rumboia! Rumboia viva!

Viva a rumboia anque sea noite e día!