Peza orixinal de Ramiro Villamor.

José Manuel G. Miguélez naceu en Santo Xusto (Palas de Rei) no ano 1961. Estudou na escola de Maestría Industrial de Lugo especializándose en telecomunicacións. Traballou en Telefónica, compaxinando a vida laboral con estudos na Escola de Arte e Deseño de Lugo e de psicoloxía na UNED.
De neno empezou a tocar a frauta e a filharmónica mentras gardaba as vacas, e enseguida se fixou nel Ramiro Villamor, gaiteiro de Santo Xusto, que o levou consigo por innumerables romarías. Toca gaita e acordeón, que foi aprendendo da man de Ramiro e os seus fillos e netos, e doutros amigos: Luís Afonso de Monterroso, Fran Cupeiro, Marisa Dapereira ou Brais Monjardín. Tamén escribe de cando en vez, sendo gañador do derradeiro certame de poesía da revista literaria A Pipa de Becerreá. Na actualidade vive en Lugo e toca co grupo de pandeireteiras da Escola de Música do Concello, para o que compuxo algunha peza musical.
Carlos Villamor naceu en Santo Xusto no ano 1956. Fillo de Ramiro, gaiteiro de Santo Xusto, empezou con el a tocar o bombo de moi pequerrecho, e continuou tocando o bombo ou tamboril en varios grupos, cos seus fillos e sobriños, tamén afamados gaiteiros. Foi albanel e formador do Instituto de Emprego. Na actualidade, vive en Santo Xusto e toca no grupo Agarimo de Palas de Rei.
Jaime Villamor naceu en Santo Xusto no ano 1952.  Empezou tocando a caixa de neno con seu pai, o gaiteiro de Santo Xusto, e herdou de Ramiro o bon facer nas artes e oficios. Tocou tamboril en grupos folk e a batería en varias orquestras. Ten unha filla e un fillo gaiteiros. Na actualidade, vive en Lugo, e toca no grupo Agarimo de Palas de Rei e na charanga Amigos de Manolo de Lugo.