24 de novembro de 2012
Auditorio da Biblioteca da Cidade da Cultura
Coa colaboración da Fundación Cidade da Cultura e da Deputación Provincial da Coruña
- Entrada de balde até completar aforo
- Acceda aquí ao vídeo de presentación do Encontro.
- Acceda aquí ao blog do encontro, e aquí á sección Palabra Audiovisual, na que están os vídeos achegados por diversos creadores/as
O ano 1996 a AELG botou a andar os Encontros de Escritores/as Novos/as, que desde 2008 teñen unha periodicidade anual, experimentando diversos formatos cada ano. Nesta sétima edición, que ten como lema «Da palabra á acción», óptase pola organización de grupos de traballo sitos en diferentes cidades galegas -formados por escritoras e escritores novas/os e creadores doutras disciplinas como poden ser a danza, as artes plásticas ou a música-, grupos que na levan inmersos nun proceso de creación desenvolvido ao longo dos últimos meses, e que rematará o día da celebración do Encontro, cando teñan a oportunidade de mostraren as súas propostas creativas e falárennos de como as desenvolveron.
Así, este VII Encontro trata de ser unha pequena plataforma dende a que mostrar ao vivo tres xeitos diferentes de creación dun espectáculo escénico interdisciplinar, partindo das orixes ata a presentación ante o público e tendo como punto de partida o texto e a palabra. Unha oportunidade de achegarnos aos procesos de creación colectiva, rachando a soidade á que normalmente estamos acostumados e debatendo sobre eles, non só dende unha visión teórica senón tamén práctica.
Ingredientes:
- 3X3 creadoras/es de diferentes disciplinas inmersos nun proceso artístico durante varios meses
- a palabra como punto de partida
- 24 de novembro como data de presentación e encontro co público
- debate, a mostra do camiño percorrido
- a palabra feita acción
Programa:
10:00 presentación
10:30 mostra do traballo grupo 1: Bingo-me, se teño sorte
Sinopse:
Caixas de zapatos. Stop. O azar xógase en cada número. Stop. Neve, serra eléctrica ou cafeteira. Non se sabe. Stop.
Integran o grupo:
María Rosendo é feminista, taberneira e poeta. De corpo Nómade, na actualidade vai migrando polos equinocios na cidade de Compostela. Sabe que na forza das mulleres está o camiño da emancipación.
Roberto Casteleiro é educador social, músico, e dalle con contar algunha cousa nos seguintes proxectos musicais: Koroiev, Fagot y Popota, Korokati, Primrose e Federico Testa.
Borja Fernández é actor e frontman no grupo de rock absurdo ES UN ÁRBOL. Colabora habitualmente con colectivos de artes escénicas coma Voadora, Chévere, Orquesta Metamovida, Pistacatro, Pt. Excéntricas, entre outros.
11:15 mesa redonda sobre o proceso artístico e conversa co público.
Interveñen: María Rosendo, Roberto Casteleiro e Borja Fernández
12:30 mostra do traballo grupo 2: Escola do Resentimento
Sinopse:
Poesía, música e danza fúndense nun devir espontáneo e natural sobre a construcción dun espazo imaxinario froito da investigación nos ámbitos da fala, o son e o movimento corporal a partir dos textos de poemario CRAC (Gonzalo Hermo, 2012). O resultado é unha combinación das especialidades de cada un dos integrantes do proxecto. Mais non todo é o que parece...
Integran o grupo:
Gonzalo Hermo é licenciado en Filoloxía Galega pola USC e actualmente traballa no Instituto da Lingua Galega. Os seus textos viron a luz en Revista das Letras, Andar21 ou Dorna. En 2010 gaña o 1º premio na modalidade de poesía do certame Xuventude Crea co poemario Crac editado por Barbantesa. É membro das Redes Escarlata.
Begoña Cuquejo é licenciada en psicoloxía e fórmase en danza contemporánea, butoh e creación escénica. Funda trasPediante e dirixe o Festival de danza e artes do corpo de rúa en Ourense, corpo(a)terra. Premio injuve por Habelas 2010, traballa noutras produccións como trans-hito, nin1mm, Baleadas, planificar a caída. Foi directiva de Danesga no 2008 e 2009.
Ariel Ninas é un artista sonoro que traballa entre a música tradicional e a vangarda experimental, principalmente coa zanfona onde toca na OMEGA, Ulobit ou Aia. Desenvolve a súa actividade profesional na producción e comunicación con aCentral Folque. No seu último proxecto en solitario desenvolve o concepto de "Música para peto" para instrumentos miúdos.
13:15 mesa redonda sobre o proceso artístico e conversa co público.
Interveñen: Gonzalo Hermo, Begoña Cuquejo, Ariel Ninas
16:30 mostra do traballo grupo 3: Medo
Sinopse:
Medo non se trata dun espectáculo baseado no terror senón na experimentación artística sobre o concepto do medo e da fobia. Trátase dunha mostra en imaxe, música e palabra na que tres artistas de diferentes campos exploran o medo tanto dende o punto de vista íntimo como dende o plano máis social do concepto (as fobias).
Integran o grupo:
Daniel Landesa é licenciado en filoloxía galega para desgracia da súa conta corrente e orgullo da parede onde seus país colgaron a orla. Creativo, enquisador, comercial de desparafusadores, bolseiro, desempregado, xefe de comunicación, amo de casa, docente, chaqueta vermella en elcorteingles, adestrador deportivo, conferenciante, borracho gracioso ou pai de familia son parte do seu currículo profesional ademáis de narrador, escritor con vocación poética e membro de Poetas da Hostia.
Andrea Costas é mestra e na súa labor creativa emprega linguaxes como instalación, vídeo ou performance, e fotografía. As súas pezas foron mostradas en varias exposicións e a súa obra premiada en certames como Novos Valores (2001), Injuve (2002), Artes Plásticas Ourense (2007). Aparte dos libros de fotografía Formas de Ser (CEF 2002) e Persoal e transferible (CEF 2006), é co-autora xunto Yolanda Castaño do libro Cociñando ao pé da letra (Galaxia 2011).
mdmme é músico dende os quince anos e na actualidade compaxina a súa actividade performática con varias liñas de investigación relacionadas co son, espazo público, arte e medio rural e a labor docente dende o ano 2000 no proxecto pedagóxico Orquesta 3xploratoria. É coordinador do espazo Alg-a Lab e director do programa de investigación sobre arte e medio rural Verbenas Periféricas.
Interveñen: Daniel Landesa, Andrea Costas e mdmme
18:30 Palabra e movemento: o espello da imaxe.
Mostra de videopoemas, pezas de videoarte e videodanza
Vexa aquí o programa en .pdf